ساکو ہک ہے تیڈی یار طلب
دِل ڈولے کھاوے نال کرب
ہے ہجر دی لمبڑی رات غضب
اتھاں میں مُٹھڑی نِت جان بلب
سوہنا خوش وسدا وِچ مُلک عرب
جِند نال ڈُکھاں دی لانب لگی
ونج جِگر دے وِچ ہے ساہنگ لگی
ّرہ عِشق تے دِلڑی اڑاہنگ لگی
ہر ویلے یار دی تاہنگ لگی
سُنجے سینے سِکدی ساہنگ لگی
ڈُکھی دِلڑی دے ہتھ ٹاہنگ لگی
تھئے مِل مِل سول سمولے سپ
دو عالم تھیں ایہہ دِل ہٹیا
جَڈاں عِشق تیڈا ہے میں کھٹیا
ونج ہِجر دی بھاہ وِچ اینہہ سَٹیا
جیں ڈینہہ دا نِینہ شِینہ پَھٹیا
لگی نیش ڈُکھاندی عیش گھٹیا
سبھ جوبن جوش خروش گھٹیا
سُکھ سَڑ گئے مر گئی طرح طرب
تیڈے ناں دا وِرد پُکار پِھراں
ہر تھاویں لبھدی یار پِھراں
گل پا تے ڈُکھاں دے ہار پِھراں
تتی تھی جوگن چو دھار پِھراں
ہند سِندھ پنجاب تے ماڑ پِھراں
سنجبار تے شہر بازار پِھراں
متاں یار مِلم کئی سانگ سبب
تُو شاہ میڈا میں باندڑی ہاں
در تیڈے دے ٹکڑے لاندڑی ہاں
میں گندڑی کوہجڑی ماندڑی ہاں
توڑے دِکھڑے دھوڑے کھاندڑی ہاں
تیڈے ناں تے مُفت وِکاندڑی ہاں
تیڈے باندیاں دی میں باندڑی ہاں
تیڈے دَر دے کُتیاں نال ادب
بے مِثل حبیب میڈا شاہِ حُسن
جیہندے پیر دی خاک ایہہ سُورج چن
لَکھ یوسف بنڑ تے بَردے پِھرن
واہ سوہنا ڈھولن یار سجن
واہ سانول ہوت حِجاز وطن
آ ڈیکھ فرید دا بیتِ حُزن
ہم روز ازل توں تاہنگ طلب
کلام حضرت خواجہ
No comments:
Post a Comment